प्रथमोपचार म्हणून भाजलेल्या जखमेवर काय लावावे ?
खरे म्हणजे भाजल्या-भाजल्या ताबडतोब आग कमी होईपर्यंत त्यावर पाणी टाकणे हाच महत्त्वाचा खरा प्रथमोपचार आहे. शक्य असेल तर Silver Salfadizine असलेला मलम त्या जखमेवर लावता येतो.

अधोरी पद्धत वापरु नका
बऱ्याच वेळा पोळलेल्या भागावर फोड येवू नये या चुकीच्या कल्पनेतून मिरची पावडर लावली जाते. हे अत्यंत चूकीचे आहे. असे कृत्य करु नये ज्या भागावर भाजले आहे, त्याच भागावर मिरची पावडर लावली तर काय होइल याचा विचार करा. काहीजण पोळलेल्या भागावर मेहंदी, टूथपेस्ट, शाई, शेण, झाडाची साल असे वाट्टेल ते लावतात.
मेहंदी आणि टूथपेस्ट या दोन्हीमध्ये केमिकल असते. पोळलेल्या भागावर हे लावल्यानंतर ती जखम खराब होते. शेण व झाडाची साल भाजलेल्या भागावर लावल्याने त्याठिकाणची आग कमी होते असा अनेकांचा समज आहे. परंतू, यामुळे इन्फेक्शन होते व ती जखम जास्त खराब होते. यामुळे असले अघोरी ईलाज करु नयेत. फक्त पोळलेल्या भागावर पाणी टाकावे.

जळीत रुग्ण उपचार
जळीत रुग्ण उपचार प्रणाली ही अत्यंत गुंतागुंतीची, किचकट व कठीण समजली जाते. या उपचारामध्ये केंव्हाही गुंतागुंत निर्माण होवू शकते. फुफ्फुसाला ईजा होवून फुफ्फुस खराब होणे, किडनीवर परिणाम होवून किडनी खराब होणे, इन्फेक्शन होवून सर्वच महत्त्वाचे ऑर्गन खराब होणे अशा गुंतागुंती गंभीर व अतिगंभीर भाजलेल्या रुग्णांमध्ये निर्माण होवू शकतात.
गेल्या 16 वर्षापासून लातूरमध्ये आम्ही जळीत उपचार केंद्र चालवतो, या केंद्रामध्ये नवनवीन तंत्रज्ञानाचा उपयोग करून अनेक अतिगंभीर रुग्णांना जीवनदान देण्यात आमच्या या केंद्राच्या टीमला यश आले आहे.