दिनांक ५ एप्रिल २००० रोजी गुढीपाडव्याच्या शुभमुहूर्तावर पूजा करून लातूर येथील यशवंतराव चव्हाण कॉम्प्लेक्समध्ये १००० स्क्वेअर फूटाच्या भाड्याच्या जागेत क्लिनीक सुरु केले. लातूर मधील सर्वच National Bank मध्ये Loan साठी मी अर्ज केले पण कोणत्याही बँकेने कर्ज दिले नाही. कारण बँकेत तारण ठेवण्यासाठी आमच्याकडे काहीच नव्हते. मी शेवटी एका बँकेच्या मॅनेजरांना म्हणालो की माझ्याकडे वैद्यकिय क्षेत्रातील भारत देशातील सर्वात मोठी डीग्री आहे. (M.Ch.) आणि तुम्ही मला दवाखान्यासाठी कर्ज देत नाहीत ? ते मॅनेजर मला म्हणाले डॉक्टर साहेब तुमच्या डीग्रीचा आम्हाला आदर आहे. पण बँकेच्या नियमाप्रमाणे काहीतरी तारण ठेवल्याशिवाय आम्ही कर्ज देऊ शकत नाहीत. आयुष्यात फर्स्ट टाईम गरीब असल्याचे खूप वाईट वाटले (आतापर्यंत गरीबी ही माझी स्ट्रेन्थ, यामुळेच आपण एवढे शिक्षण घेतले) आणि फोनवर मोठे भाऊ डॉ. तात्याराव लहाने यांच्याशी बोललो व खूप भाऊक झालो, खूप रडलो. दुस-या दिवशी त्यांनी त्यांचा एक मित्र माझ्याकडे पाठवला त्यांनी त्यांची जमीन तारण म्हणून बँकेत लिहून दिली व मला वैद्यनाथ को-ऑपरेटीव्ह बँकेकडून कर्ज मिळाले आणि दि.२१ मे २००० या दिवशी त्याच जागेत पेशंटसाठी तीन रुम, माझ्यासाठी एक व माझ्या पत्नीसाठी एक कन्सल्टींग व एक ऑपरेशन थिएटर असे हॉस्पिटल सुरु केले. हॉस्पिटलसाठी अत्यंत जरुरीची असणारी यंत्रसामुग्री खरेदी केली. लहाने प्लास्टीक व कॉस्मेटीक सर्जरी सेंटर या नावाने हॉस्पिटलची सुरुवात केली. याचे उद्घाटन माझे अध्यात्मिक गुरु ह.भ.प. विठ्ठलप्रसाद महाराज धर्मापुरीकर यांच्या शुभ हस्ते व डॉ. तात्याराव लहाने, डॉ. चंद्रकांत शिरोळे, प्राचार्य अनिरुध्द जाधव सर यांच्या प्रमुख उपस्थितीत संपन्न झाले.
लातूर मधील पहिले प्लास्टिक व कॉस्मेटिक सर्जरी सेंटर सुरू झाले. या विषयाची फारशी माहिती लातूरकरांना नव्हती लातूरमध्ये प्रॅक्टिस सुरू केल्यानंतर पाच-सहा महिन्यांनी असे लक्षात आले की लातूर परिसरामध्ये जळीत रुग्ण उपचार केंद्राची अत्यंत आवश्यकता आहे. ही गोष्ट मी माझे मित्र डॉ.राजेश शाह यांच्या कानावर घातली आणि ते लगेच हो म्हणाले आणि आम्ही दोघांनी २६ मार्च २००१ रोजी गुढीपाडव्याच्या शुभमुहूर्तावर जळीत रुग्ण केंद्राची सुरुवात केली. त्यासाठी आम्ही चार रूम आणि एक ऑपरेशन थियटरसाठीची जागा यशवंतराव चव्हाण कॉम्प्लेक्सच्या दुसऱ्या मजल्यावर भाड्याने घेऊन हे युनिट सुरू केले.
वर्षभरातच पेशंटचा ओढा प्रचंड वाढला आणि जागा कमी पडू लागली.११ एप्रिल २००१ रोजी गुढीपाडव्याच्या दिवशी आम्ही जळीत रुग्ण केंद्राचा विस्तार केला आणि नवीन पाच रूम पुन्हा भाड्याने घेतल्या.
२१ मे २००१ रोजी हॉस्पिटलचा पहिला वर्धापन दिन कुष्ठरोगामुळे(लेप्रसी) निर्माण झालेल्या व्यंगावर मोफत शस्त्रक्रिया करून साजरा केला. हीच परंपरा पुढे चालू ठेवत हॉस्पिटलचा दुसरा, तिसरा आणि चौथा वर्धापन दिन ‘दुभंगलेले ओठ व टाळू’ या जन्मजात व्यंगावर शस्त्रक्रिया करून साजरा करण्यात आला. त्यात अनुक्रमे ११,१८ व २५ सर्जरी करण्यात आल्या होत्या. तेव्हा असे लक्षात आले की अशा जन्मजात व्यंगाचे अनेक रुग्ण आहेत.या सर्वांपर्यंत पोहोचण्यासाठी हा उपक्रम वर्षातून फक्त एकदा करून चालणार नाही. म्हणून ‘स्माईल ट्रेन, अमेरिका’ या क्लेफ्ट चॅरिटेबल ऑर्गनायझेशनशी अनेक पत्र लिहून संपर्क साधला व त्यांना या भागातील रुग्णांच्या या व्यंगावरील उपचाराची गरज निदर्शनास आणून दिली. श्री. सतीश कालरा यांनी प्रथम फोन करून या विषयाची सखोल चौकशी केली व येथील गरज लक्षात आल्यानंतर त्यांनी स्वतः २८ ऑक्टोबर २००४ रोजी लहाने हॉस्पिटल, लातूर येथे भेट दिली आणि लगेचच स्माईल ट्रेन बरोबर काम करण्याची परवानगी मिळाली. अशा रितीने स्माईल ट्रेन, अमेरिका आणि लहान हॉस्पिटल, लातूर यांच्या संयुक्त विद्यमाने ‘दुभंगलेले ओठ व टाळू’ या जन्मजात व्यंगावर वर्षभर मोफत प्लास्टिक सर्जरी उपक्रम डिसेंबर २००४ पासून लहाने हॉस्पिटल,लातूर येथे सुरू करण्यात आला.